Monday, July 15, 2013

makeup basics items " منتجات المكياج الأسياسية عند كل بنت

السلام عليكم "

اليوم البوست بناء على طلب كثير من متابعاتي
( المكياج الأساسي عند كل بنت )
فيه بنات كثير مايكون عندهم خلفية عن المنتجات الضرورية في المكياج

عشان كدا اليوم جبت لكم معلومات بسيطة عن كل المنتجات الضرورية واللي لازم تكون في تسريحة كل بنت
وجبت لكم خيارات كثير لكل منتج
ونوعتها بين الهاي آند والدرقستور
الهاي آند زي : ماك و شانيل وميك آب فور ايفر وديور ونارس وبوبي براون
والدرقستور زي : مايبلين وريفلون وريميل ونيكس وإلف

يالله نبدأ ^_^

 أول شي البرايمر أو البيس
يكون البرايمر أو البيس عادة على شكل سائل أو كريم
 يتوزع على كامل الوجه بعد ماتحطي الكريم المرطب و قبل كريم الأساس و المكياج.  البرايمر يعتبر قاعدة على الوجه عشان يخلي توزيع كريم الأساس سهل
 وكمان يساعد أنو يثبت المكياج على الوجه مدة أطول.
وانصح صاحبات البشرة الدهنية والمختلطة انهم يستخدموه قبل الاساس
لأنه رح يخفف كمية الدهون بالوجه ويخفف اللمعان اللي يطلع بعد كم ساعة من وضع المكياج
 نجي لكريم الأساس أو الفاونديشين
طبعاً كلنا نعرف الفاونديشين وأيش شغلته
يخفي العيوب ويوحد لون البشرة ويعطي شكل مرتب
وهوا اللي رح نحط بعده كل المكياج
طبعاً في أنواع كثير للفاونديشن
سائل وكريمي وجل وموس وغيرها كثير
غالباً بنستخدم السائل
واختاري النوع اللي يوصلك للنتيجة اللي تبغيها
لو تحبي اللوك ديوي او رطب جربي استخدمي نارس شير غلو او لوريال ترو ماتش لومي
ولو تحبي المات او المطفي جربي ايستي لودر دبل وير او ريميل ستاي مات

 البي بي كريم - بديل كريم الأساس
البي بي كريم أنتشر من فترة عندنا بشكل رهيب
هوا يعتبر بديل للفاونديشن لكن تغطيته أخف بكثير
يناسب القمورات اللي ماعنهم عيوب ببشرتهم ( الله يحفظهم ) واللي عيوبهم خفيفة
كثير ماركات نزلت نسخ منو
جربي وأختاري اللي يناسب بشرتك

 كونسيلر - خافي العيوب
 مستحضر مهمته الأولى والأهم إخفاء العيوب في الوجه زي الحبوب وأثارها وعلامات الجروح الخفيفة
وأهم شي الهالات السوداء في محيط العين
حتلاقي منو أنواع كثير
سائل - غالبا تغطيته خفيفة نوعاً ما
كريمي - تغطيته ثقيله
وفيه موس وجل وغيرها كثير وكل واحد له مزايا معينة ومختلفة
 بودرة الوجه
مهمتها الأولى تثبيت كريم الأساس كمان تستخدم للتحكم في الزيوت الي تفرزها بشرة الوجه
ومنها أنواع كثير
لوس باودر - بودرة مضغوطة وغيرها كثير
غالبا أنصح بالمضغوطة وبالذات إذا بشرتك فيها عيوب أو قشور خفييييييفة
 الحواجب - المعاناة هههههه
الحواجب ممكن ترسميها بأكثر من منتج
بودرة حواجب - قلم حواجب -جل حواجب
أختاري اللي يناسبك ^_^
ونصيحة سريعة - أبعدي عن اللون الأسود قد ماتقدري
حتى لو شعرك أسود أستخدمي بني عشان يطلع شكل حواجبك طبيعي ومرتب
وماتطلعي كأنك دراكولا
 برايمر العين
من أهم أهم أهم الأشياء اللي لازم تستخدمهت كل بنت
 يوحد لون العين قبل ماتحطي الآيشادو وكمان يخليه يثبت مايسيح ولايبهت ويبرز لون الآيشادو اللي انتي بتستخدميه وأهم شي أنو مايخلي الأيشادو يتجمع في خطوط على جفنك
حتلاقي منو أشكال كثير
كريمي - سائل - جل وغيرها
أختاري اللي يناسبك ^_^

الأيشادوهات
لو كنتي تحبي الألوان الطبيعية الهادية أنصحك بباليت نيكد بيسك - ألوانه طبيعية وكلها مطفية
ولو كنتي تحبي الطبيعي وتبغي تنوعي بين المطفي والشيمري أختاري نيكد 1 أو 2 أو أختاري باليت لوراك
أما إذا كنتي تحبي تنوعي بالألوان أنصحك بآيشادوهات ماك وميك آب فور أيفر السينغلز
أو أختاري باليت 180 لون المعروف عالمياً

 أقلام العين - أسود وملون
جربت أقلام عيون كثير وفيه اللي تصيب واللي تخيب
في الصورة حطيتلكم اللي جربتها وعجبتني

 الأيلاينر السائل
طبعا مين تقدر تستغني عنو الفترة دي !!!!! كلنا صرنا نعشقه
بالنسبة عليا من عشاق آيلانير سيفورا ^_^ أسود فاااحم واستخدامه سهل

الجل آيلاينر
بديل عن الآيلاينر السائل
جميل وثابت وسهل الاستخدام
بالنسبة ليا مغرمة بتبع إنقلوت ^_^ أسووووووود بمعنى الكلمة

الماسكرا
كلنا نستخدمها ومانقدر نعيش من غيرها
أختاري النوع اللي يناسبك
تكثيف - تطويل - أو كلها مع بعض

البرونزر
 يعطي الوجه لون أسمر جذاب
يستخدم لتغميق لون البشرة بشكل خفيف
ويعطي لون صحي للبشرة البيضاء الباهتة
وأهم شي أنو يستخدم نحت الوجه أو الكونتور
له أنواع كثير
بودرة - كريمي - سائل
وممكن تستخدمي بودرة غامقة بديل للبرونزر
أو تستخدمي أساس أغمق من أساسك المعتاد

  الهايلايتر - الاضاءة
إضاءة توزعيها على المناطق اللي تحبي تبرزيها في الوجه
عظمة الخدين - عظمة الأنف - قوس الشفايف
ويعطي الوجه إشراقه حلوة
كمان له أنواع كثير
بودرة - كريمي - سائل
بالنسبة ليا أحب الهايلايتر السائل في الصيف
يعطي لمعة ولوك ديوي مرره جميل
 البلاشرز - أحمر الخدود
كلنا نعرف أيش هوا
منو أنواع كثير
بودرة - كريمي - سائل
بالنسبة ليا أنا مغررررمة بالكريمي
يعطي الوجه لوك ديوي وصحي
 محدد الشفايف
مهم مهم مهم
يثبت الروج مايخليه يسيح برا شفايفك
وممكن يستخدم كبديل للروج
ويصير زي الروج المطفي
بالنسبة ليا مغرمة بمحددات ريميل ونيكس

 الأرواج
لها أنواع وألوان كثيييييييييييير
مطفي وبلمعة وشيمر وثابته وسائلة وغيرها كثيييييير
معلومة - أرواج ريفلون تعتبر نوعاً ما بديل جيد لأرواج ماك
وألوانها قريبة من ألوان ماك
الخطوة الأخيرة في المكياج
واللي ممكن تضمن سعادتك لبقية اليوم اللي تكوني حاطة فيه مكياج
مثبت المكياج
كثير بنات مايهتموا للشي دا
لكن بجد بجد أعتبره أهم شي
بوالذات جونا في السعودية وجدة بالذات يخلينا نهتم بمثبت المكياج أكثر من المكياج نفسو
مهمته زي أسمو
يثبت المكياج عشان مايسيح مع الرطوبة والحر
وغير كدا بيعطي نهاية حلوة ومشرقة لمكياجك
طريقة أستخدامه أنك بعد ماتوزعي البرايمر تبع الوجه تبخي رشتين على وجهك وتخليه لحد مايجف بعد حطي الاساس وكملي مكياجك
وبعد ماتخلصي كمان بخي رشتين ثانية
وبكذا تكوني ثبتي مكياجك بطريقة صح
وكمان له أستخدامات ثانية ^_^
وممكن تستخدمة مع البيجمنت - اللي هوا اللوس شادو
عشان يثبته عالجفن
وممكن تبخي منو على أسفنجة البيوتي بلندر قبل ماتدمجي الأساس عشان يسهل لك الدمج
كمان ممكن ترشي منو على فرشة الظل تبعك قبل ماتبدأي تشتغلي فيها
بكذا تضمني لون غني وبعيد عن البهتان

وووووووووووبس
بكذا أكون خلصت البوست
صحيح طويل حبتين بس حبيت أحط كل شي كاامل

لو عجبكم البوست تابعوني على
وحتلاقوا طريقة الأشتراك هنـــا

وكمان لا تنسوا تشتركوا في القيف اواي ^_^ حتلاقوها في التدوينات اللي قبل هذي 
باااقي يوم واااحد بس
يعني شدوا حيلكم وألحقوا 
موفقييييييييين 

Love
XOXO

6 comments:

  1. ثانكيوووو على هالبوست الحين بغير كل مكياجي وبشتري من الاول سويت تان وصرت سمرا فلام اغير اغلب الاشياءحتى الارواج بعضها ماصار يليق على السمار وحتى البلشرز منجد مره شكرا

    ReplyDelete
    Replies
    1. حياتي انتي ^_^
      يااعيني ياااااعيني تان وصيف ^_* حركااات يابنت
      الحمدللة اني افدتك ولو بشي بسيط ^_^
      لا تنسي توريني الاشياء اللي حتشتريها

      Delete
  2. مشكوره عزيزتي من جد معلومات قيمه

    ReplyDelete
  3. بوووست مررا حلو مررررا مرررا جميل تسلمي

    ReplyDelete
  4. حبيت المعلومات. ماشالله ثلاث ارباع المنتجات عندي وانشالله تكمل الباقي هيهيههي
    تسلمي (:

    ReplyDelete